ШАЛКӨДЕ. 1991 ж.

Шалғыныңа ат байладым, Шалкөде,

Шабытыма от байладың, Шалкөде.

Шалқар ақын сенде туды, Шалкөде,

Шылбырынан қақпайладым, Шалкөде.

Жолға салдың жас ұлыңды, Шалкөде,

Жаным саған асығулы, Шалкөде.

Жомарт жаның жүрегiмде, Шалкөде,

Жөн көремiн бас ұруды, Шалкөде.

Мәрт мiнездi сен екенсiң, Шалкөде,

Қарт мiнездi жер екенсiң, Шалкөде.

Көкемарал бел екенсiң, Шалкөде,

Көкейдегi төр екенсiң, Шалкөде.

Самалыңнан қанып iштiм, Шалкөде,

Биiгiңнен барып iштiм,Шалкөде.

Мұрагерi - Қарасаздай  қайнардың

Куәгерi сағыныштың, Шалкөде.

Сенi көрiп, бiр қуандым, Шалкөде,

Хан - тәңiрдiң бұлтын алдым, Шалкөде.

Жусаның боп бұрқырармын, Шалкөде,

Құлының боп шұрқырармын, Шалкөде.

Жүрегiмдi елеңдеттiң, Шалкөде,

Ұлылықты дәлелдеттiң, Шалкөде.

Мұқағали секiлденiп мұңайып,

Мен өзiңнен әрең кеттiм, Шалкөде!